លេងសើចអី! Ronaldo បង្ហើបថាទាល់តែចូលដល់អាយុខ្ទង់ប៉ុននេះ ទើបខ្លួនប្រកាសចូលនិវត្តន៍

ថ្មីៗនេះ ខ្សែប្រយុទ្ធ Cristiano Ronaldo បាន​បង្ហើបប្រាប់ពីឆ្នាំណា ​ដែលខ្លួននឹងពិចារណាចូលនិវត្តន៍ពីអាជីពបាល់ទាត់ បន្ទាប់ពីទទួលបានរង្វាន់មួយផ្សេងទៀត ពីសំណាក់ FIFA ។

ជាក់ស្តែងកីឡាករដែលមានវ័យ ៣៦ ឆ្នាំរូបនេះ មានអាជីពដ៏គួរឱ្យចាប់អារម្មណ៍បំផុតមួយ នៅក្នុងពិភពបាល់ទាត់ ដោយបានឈ្នះពានរង្វាន់នៅទូទាំងទ្វីបអឺរ៉ុប ជាមួយនឹងក្រុមកំពូលៗដូចជា Manchester United, Real Madrid និង Juventus ។

ហើយនៅក្នុងចំណោមសមិទ្ធិផលទាំងនោះ ក៏រួមមានទាំងពានរង្វាន់ Champions League ចំនួនប្រាំ ពានរង្វាន់លីគចំនួន ៧ និងពានរង្វាន់ក្នុងស្រុកចំនួន ៦ ក៏ដូចជា Ballon d’Or ចំនួនប្រាំដងផងដែរ ។

ដោយឡែក ក្នុង​ពិធី​ប្រគល់​ពាន​រង្វាន់ FIFA’s The Best កាល​ពី​យប់​ថ្ងៃ​ចន្ទ Ronaldo ត្រូវ​បាន​គេប្រគល់​ពាន​រង្វាន់​ដ៏ពិសេស​មួយ សម្រាប់​កំណត់ត្រា​ស៊ុតបញ្ចូលទី សម្រាប់ក្រុមជម្រើសជាតិ​ព័រទុយហ្គាល់ទៀតផង ។

មិនតែប៉ុណ្ណោះ នៅក្នុងអំឡុងកម្មវិធីនោះ  Ronaldo ត្រូវ​បាន​គេ​សួរ​នាំអំពី​អនាគត ខណ:រូបគេបានឆ្លើយតបវិញថា ​៖ “​ពេល​ខ្លះ​គេ​សួរ​ខ្ញុំ​ថា​ខ្ញុំ​នឹង​លេង​ប៉ុន្មាន​ឆ្នាំ​ទៀត ហើយ​ខ្ញុំ​សង្ឃឹម​ថា​នឹងអាច​លេង​បានបួន ទៅ​ប្រាំ​ឆ្នាំ​ទៀត។ ហើយវានឹងអាស្រ័យទៅលើ​ផ្លូវចិត្ត​ប៉ុណ្ណោះ ” ​៕

ប្រភព: Mirror