Man Utd ចង់​យក​គ្រូ​ស៊ី​ថ្លៃ​បំផុត​ក្នុង​លោក ៤៨០ ០០០ ផោន/សប្ដាហ៍ មក​ចាត់ការ​ក្លឹប

ក្លឹប​បិសាច​ក្រហម Man Utd នឹង​មិន​មាន​គម្រោង​បន្ត​កុងត្រា​ថ្មី សម្រាប់​លោក Ralf Rangnick នោះ​ទេ ជា​រួម​ក្រោយ​ចប់​កុងត្រា​នា​ចុង​ខែ​មិថុនា​ខាង​មុខ នោះ​ក្លឹប​នឹង​សម្រេច​នាំ​យក​អ្នកចាត់ការ​ពេញ​សិទ្ធ​ណា​មួយ​មក​ដឹកនាំ។

មាន​បេក្ខភាព​ធំៗ​ជា​ច្រើន ដែល​យើង​ធ្លាប់​លេចលឺ​កន្លង​មក តែ​យ៉ាង​ណា​តាម​របាយការណ៍​ថ្មី​ពី​សារព័ត៌មាន El Nacional ចុះ​ផ្សាយ​ថ្ងៃ​នេះ គឺ​បង្ហាញ​ថា ក្លឹប​ម្ចាស់ដី Old Trafford កំពុង​ចាប់​អារម្មណ៍​ទៅ​លើ​គ្រូ​នៃ​ក្លឹប Atletico Madrid ដោយ​ក្លឹប​ក៏​មិន​ញញើ.ត​នោះ​ដែរ ក្នុង​ការ​ចាយវាយ​ប្រាក់​ឈ្នួល បើ​ទោះ​បី​បុរស​សញ្ជាតិ​អាហ្សង់ទីន ជាប់​ឈ្មោះ​ជា​គ្រូ​ស៊ី​ថ្លៃ​បំផុត​ក្នុង​លោក​ក៏​ដោយ។

ប្រភព​បាន​ឲ្យ​ដឹង​ថា United នឹង​ព្រម​ផ្តល់​ប្រាក់​ឈ្នួល ៤៨០ ០០០ ផោន/សប្តាហ៍​ ឬ​ប្រហែល​ជិត ២១ លាន​ផោន/ឆ្នាំ ឲ្យ​តែ Simeone ព្រម​ដើរ​ចេញ​ពី​ក្លឹប​កាន់​ឆ្នាំ Atletico ហើយ​ផ្ទេរ​មក​ដឹកនាំ Man Utd។

រំឭក​ដែរ​ថា បុរស​វ័យ ៥១ ឆ្នាំ បាន​មក​ដឹកនាំ At Madrid តាំង​តែ​ពី​ចុង​ខែ​ធ្នូ ឆ្នាំ ២០១១ គិត​មក​ទល់​ពេល​នេះ មាន​រយៈ​ពេល ១ ទសវត្ស​មក​ហើយ។ រី​ឯ​សុពលភាព​កុងត្រា​ គឺ​នៅ​សេសសល់​ដល់​ចុង​ខែ​មិថុនា ឆ្នាំ ២០២៤៕

ប្រភព៖ El Nacional