Chelsea បើក​ឱកាស​ឱ្យ​ R.Madrid ចុះ​កុង​ត្រា​យក​តារា​ឆ្នើម​ខ្លួន​ម្នាក់​ នៅ​រដូវ​ក្តៅ​នេះ​ ​

ថ្មីៗនេះ ក្លិបតោខៀវ Chelsea ត្រូវបានគេរាយការណ៍ថា បានផ្តល់ឱកាសឱ្យក្រុមយក្សអេស្ប៉ាញ Real Madrid នៅក្នុងការចុះហត្ថលេខាលើតារាឆ្នើមរបស់ខ្លួនមួយរូប នៅទីផ្សារដោះដូរកីឡាករ រដូវក្តៅនេះ ។

ជាក់ស្តែង កីឡាករដែល Chelsea ចង់ឱ្យផ្ទេរទៅ Madrid នោះ គឺខ្សែប្រយុទ្ធ Timo Werner នៅពេលដែលកីឡាករសញ្ជាតិអាល្លឺម៉ង់រូបនេះ ហាក់ជួបប្រទះជាមួយភាពលំបាកយ៉ាងខ្លាំង ចាប់តាំងពីបានមកដល់ទឹកដី Stamford Bridge ពីក្រុម RB Leipzig ក្នុងឆ្នាំ ២០២០ មក ។

យ៉ាងណាថ្មីៗនេះ យោងតាមការចុះផ្សាយពី Cadena Ser បានបង្ហាញថាក្លិប Chelsea កំពុងចង់ចែកផ្លូវជាមួយ Werner នៅរដូវក្តៅនេះ ហើយថែមទាំងបានបើកដៃឱ្យក្លិប R.Madrid ចុះហត្ថលេខានាំយករូបគេ ទៅកាន់ទឹកដីអេស្ប៉ាញទៀតផង ។

មិនតែប៉ុណ្ណោះ ប្រភពដដែលនេះ ក៏បានអះអាងផងដែរថា ក្លិប La Liga មានបំណងក្នុងការចុះហត្ថលេខាលើខ្សែប្រយុទ្ធរូបនេះ នៅក្នុងលក្ខខណ្ឌខ្ចីជើង បូករួមជាមួយជម្រើសក្នុងការទិញផ្តាច់ ៕

ប្រភព: AF