អតីត​នាយក​ជាន់​ខ្ពស់ Mijatovic៖ “វា​មិន​អាច​ទៅ​រួច​ទេ ដែល Ronaldo នឹង​ទៅ​ចុះចូល​ក្លឹប​ថ្មី​នេះ”

អតីត​នាយក​ជាន់​ខ្ពស់​នៃ​ក្លឹប Real Madrid លោក Pedja Mijatovic បាន​បង្ហាញ​ការ​ជឿជាក់​ថា ព័ត៌មាន​ដែល Cristiano Ronaldo នឹង​ទៅ​ចូលរួម​ជាមួយ​ក្លឹប Atletico Madrid គឺ​វា​ពិត​ជា​មិន​អាច​ទៅ​រួច​ទេ ពោល​គ្មាន​ហេតុផល​អ្វី ត្រូវ​បុរស​វ័យ ៣៧ ឆ្នាំ​ទៅ​ចុះចូល​នៅ​ក្លឹប​គូ​ប្រជែង​របស់​ស្តេច​ស​នោះ​ទេ។

ជា​ការ​ពិត​តាម​ចចាមអារ៉ាម បន្ទាប់​កីឡាករ​ព័រទុយហ្គាល់​គិត​ចង់​ដើរ​ចេញ​ពី Old Trafford ក៏​ស្រាប់​តែ​មាន​ការ​ផ្សារភ្ជាប់​ឈ្មោះ CR7 ទៅ​កាន់​ក្លឹប​ជា​សត្រូ.វ​ ដឹកនាំ​ដោយ​លោក Diego Simeone។ ទន្ទឹម​នោះ ក៏​មាន​អ្នក​គាំទ្រ​បង្ហាញ​ការ​មិន​ពេញ​ចិត្ត និង​មិន​ស្វាគមន៍ រី​ឯ CR7 ត្រឹម​បញ្ចេញ​មតិ​យោបល់ ជា​រូបភាព​អស់​សំណើច។

ងាក​មក​លោក Mijatovic បាន​ប្រាប់​ទៅ​សារព័ត៌មាន El Larguero ដូច្នោះ​ថា៖ “ខ្ញុំ​គិត​ថា​វា​អត់​អាច​ទៅ​រួច​ទេ ខ្ញុំ​អត់​ដឹង​ស្ថានភាព​បែប​ម៉េច​ទេ ហើយ​ក៏​អត់​មាន​ប្រភព​ព័ត៌មាន​អ្វី​ច្បាស់ការ​ដែរ គ្រាន់​ថា​យល់​ឃើញ​ដូច​អ្វី​ដែល​អ្នក​រាល់​គ្នា​យល់​ឃើញ នោះ​គឺ​ភាព​មិន​អាច​ទៅ​រួច”។

លោក​បន្ត៖ “ខ្ញុំ​គិត​ថា​វា​ត្រឹម​ជា​ក្តីស្រមៃ​ប៉ុណ្ណោះ​ឯង ព្រោះ​វា​ជា​រឿង​ចម្លែក​ការ​ដែល​យើង​គិត​ថា CR7 នឹង​ទៅ​វិល​ទៅ​លេង​ក្នុង​ទីក្រុង Madrid ទល់​ក្លឹប Real Madrid ប្រហែល​ខ្ញុំ​ត្រូវ​ញី​ភ្នែក​ទាំង​សង​ខាង​ហើយ”៕

ប្រភព៖ បរទេស