គ្រូ​ធំ Tuchel ថា​ដោយសារ​ហេតុផល ២ នេះ Chelsea អត់​សង្ឃឹម​លើក​ពាន PL ទេ

អ្នកចាត់ការ​ក្លឹប​តោ​ខៀវ Chelsea លោក Thomas Tuchel បាន​និយាយ​ក្រោយ​ចប់​ការ​ប្រកួត ជុំវិញ​ការ​មិន​សប្បាយ​ចិត្ត ដែល​ក្រុម​លេង​ត្រឹម​ស្មើ Brentford ១-១ នាំ​ឲ្យ​គម្លាត​ពិន្ទុ​របស់​ពួក​គេ ចាញ់​ក្រុម​កំពូល​តារាង Man City ដល់​ទៅ ៨ ពិន្ទុ​ឯ​ណោះ។

ក្រោយ​ចប់​ការ​ប្រកួត អ្នកចាត់ការ​សញ្ជាតិ​អាល្លឺម៉ង់ ក៏​បញ្ជាក់​ច្បាស់ៗ ថា​ក្រុម​តោ​ខៀវ នឹង​មិន​សង្ឃឹម​អាច​លើក​ពាន​រង្វាន់ Premier League នោះ​ទេ បើ​ផ្អែក​ទៅ​តាម​ស្ថានភាព​ដែល​កំពុង​ជួប​ប្រទះ​សព្វថ្ងៃ ពោល​លើ​បញ្ហា​ចម្បង ២ ទី ១) កីឡាករ​មាន​កើត​ជំងឺ COVID-19 និង ទី ២) កីឡាករ​ជា​ច្រើន​រង​របួ.ស​បន្ត​កន្ទុយ​គ្នា។

Tuchel ថា៖ “តើ​យើង​ដោះស្រាយ​រឿង​នេះ​យ៉ាង​ម៉េច យើង​ឃើញ​ករណី​កីឡាករ​កើត​កូវីដ ដោយ​មាន​កីឡាករ ៥ ឬ ៦ រូប ខ្លះ​ខកខាន​ការ​ឈរ​ជើង ៦ ឬ​ច្រើន​សប្ដាហ៍​ជាង​នេះ ហើយ​ឲ្យ​ទៅ​ប្រជែង​ពាន​រង្វាន់​បែប​ម៉េច ដោយ​វា​ជា​រឿង​ឆ្កួ.ត​ឡ.ប់​បើ​យើង​គិត​អំពី​រឿង​នេះ នៅ​ពេល​ដែល​យើង​កំពុង​ជួប​ប្រទះ​បញ្ហា​កូវីដ និង​របួ.ស​កីឡាករ​ជា​ច្រើន ដូច្នេះ​យើង​មាន​តែ​សម្រប​ទៅ​តាម​ស្ថានភាព​ជាក់ស្ដែង”។

គួរ​បញ្ជាក់​ថា កីឡាករ​សំខាន់ៗ​ដែល Chelsea កំពុង​អវត្តមាន មាន​ដូច​ជា Ben Chilwell, Timo Werner, Rubenn Loftus-Cheek, Reece James និង Andreas Christensen ជា​ដើម។ សម្រាប់​ខ្សែ​ការពារ​ Chiwell ករណី​ធ្ងន់.ធ្ងរ​ជាង​គេ ដោយ​រំពឹង​នឹង​ខកខាន​ដល់​បញ្ចប់​រដូវ​កាល​ឯ​ណោះ៕

ប្រភព៖ Metro